محتسب مستی گوروب یولدا یاپشدی یاخاسین
مست اونا سویلدی بوشلا یاخام افسار دگل
می ایچوبسن دیدی لازمدی که تنبیه اولاسان
دیدی مستم منه تنبیه ایله دشوار دگل
دیدی لایعقل اولوب صاق صولا لنگر ورورسان
دیدی من دوز گیدورم یول منه هموار دگل
دیدی لازمدی که گورسون سنی تا قاضی شهر
گیت سحر گل دیدی قاضی گئجه بیدار دگل
دیدی قاضی ده اگر یاتسا اویاقدور والی
نه بیلورسن دیدی قاضی ئوزی خمار دگل
آپاروم گل دیدی یات صبحه کیمی مسجدده
دیدی آللهون ایوی مسکن بدکار دگل
نچه دینار دیدی ویر منه گزلنجه قوتار
حکم شرعون دیدی سرپوشی که دینار دگل
دیدی دینار یوخوندور چخادیم کوینگوی
کهنه کوینک دیدی شایسته ی سرکار دگل
بی خبرسن دیدی بورکونده دوشوب باشوندن
عقل سیز باشدا دیدی اولمسا بورک عار دگل
دیدی اولما چوخ ایچوبسن ایتروبسن ئوزوی
دیدی بیهوده دیمه سوز کم و بسیار دگل
دیدی هشیار گرک مسته ورا حد گناه
دیدی می شهریدی بوردا بیری هوشیار دگل
پروین اعتصامی
